大航海家4：一个王朝的崛起——试玩报告(來自香港的)

　　自從上次出左 Mafia 2 既報告之後，我一直反思應唔應該繼續寫類似既報告。咁啱呢個週末俾我見到我好鐘意既Patrician IV 竟然無聲無氣下出左，咁當然要第一時間試玩一下啦!不過講明先，我其實係好唔鐘意 Kalypso Media 之前出既 M.U.D. TV (電視台模擬Game)，因為有好大個bugs發現左(會hang 機/跳出Windows)，但竟然到現在 (八個月後)都仲係完全無視玩家既投訴，二百幾蚊個Game 就咁掉入垃圾桶，真係好心痛呀!

　　如果你話隻Game 係滄海遺珠，我絕對相信。我曾經上過Patrician IV 既Official Forum，發現Forum 內真係無乜人，就算係出版既新聞都係得幾個，可以話係全無人氣。點解Kalypso Media 呢間垃圾公司可以咁樣糟蹋D 遊戲架?OK ! 出完氣，係時候進入正題。

　　首先，我點解有得玩個Game 大家心照啦!(果班狂插人唔買正版既玩家可以唔使睇落去喇!) 其實個Game 並非全英文版，要在安裝之後入 ini 檔案到修改遊戲語言，之後大部分Game 內既字都會係英文，但有個別會去怪獸字，尤其係做 Tribute 既assignment，好多時候出左%%，永遠睇唔到個requirement。另外，所有Movie 都係講返德文，希望真正出版時會改返為英文喇!

　　好!今次遊戲背景依然係以北歐為本，最多有26個城市玩，每個城市都有出資源/商品，玩家在開始時要選指定既城市之一為 home town，而遊戲一開始時只有Home town 有 Counting House (帳房)，可以幫忙管理 帳目、貨倉、自動進行買賣、請警衛保護設施等等。開始時玩家只有一架細船，但Home town 多數為大城市，有Shipyard 可以upgrade船、造船、買賣船、維修 等，我就做左幾筆買賣之後0係 Shipyard 買現貨既細船，可以做更大筆買賣。要造新既都可以，不過要有足夠material (物料)及一段長時間。

　　講返遊戲，今次第4代 比第3代既畫面更加細緻，可以Zoom 入城，不過Zoom都最大D 市民都仲係豆鼓咁細粒。建築物既風格都係好典型，只有兩種風格，顯然，呢個跟本唔係重點!今次既城比前幾代都大左，即係話玩家可以0係城裏面起更多建築物。今次仲增加左唔少建築物，由種稙場/農場、製造工場 呢D生產建築物 到 水井、廣場等既人民建築、仲可以 建/收購 民房收租 (仲有唔同價格，越近市中心越貴)。

　　今次的目標係提高 Ranking/Reputation。Reputation 越高 (玩家於每個城都會有唔同 reputation，開始時所有城都係 0%)，就可以到每個城既 Guide (商會) 用錢買到權力，例如建帳房(進駐該城/建立分店)、到可以建種稙場/農場、製造工場，最後可以買個permission 去地中海做買賣(買香料 返唻大賣!)。到遊戲中後期，當玩家於城中獲得高 reputation (名譽)之後，仲可以參選做市長 (Mayor)!做市長 可以調整稅率、起更多人民建築 (包括擴大 教堂/船廠、大學、醫務衛生 甚至 防衛塔/城牆等)。講到提高reputation，不外乎 入口Demand Goods (城市中儲存額低既資源)、多做買賣、送錢Donate 俾教堂 (不過金額會越唻越高)、送食物俾窮人。另外，玩家於Game 裡面都有 Ranking，由開始時既 Trader (商人) 到 最高既 Patrician，而Ranking 既提升靠四個主因，財富、擁有船數目、手下既工人數目 及 Counting House 帳房數目 (每個城只可有一個 帳房)。

　　今次第4代 於做生意/經營方面比較容易(可能我只係玩Normal 難度)，所有對手都只係用口警告你，但實際上又好似冇乜實質工作去阻止我既發展/壯大!今次一樣有海盜，而且發展得快，但通常發展到5-7 隻船就會停止，初時的確俾海盜 搶左唔少貨，因為我既海戰唔掂，不過之後有錢又成立左護航隊，海盜就少左好多。今次既海戰，我認為有進步，不過一向唔識打海戰既我，0係頭兩次慘敗之後就冇再進入海戰，由電腦自己計算勝負。但我發現，只要你既船隊有同海盜差唔多既 水手、砲，咁你就多數會贏，可能我只係玩Normal 難度啦!另外，我由開始玩到Quit，玩左10 年有多都仲係得 3 種船可以用，我懷疑係咪要研究 又或 upgrade 個船廠先可以有更多船種呢?(我於Quit 之前已經玩左十多個小時，剛做市長，未來得及upgrade 個船廠呢!)

　　資源數目/種類 基本上同3代差唔多，其實我覺得可以加多D 種類 又或 多D connections (點講呢?應該係話好似 Anno 1404 咁，要種Grain 之後加工成麵包，而Grain 又可以養豬/羊，做出豬肉、羊毛等!)，咁樣就會加強 resources (資源)既競爭/需求，開發至運送資源時又要做更多既考慮啦!

　　政治上多左做工作，今次可以參選做市長，而市長可以有更多權力。但我認為政治方面可以再去盡D，例如 增加多D政治選擇/活動，有冇反對黨呢!市長可以建立軍隊 或 獨立於统冶者外等。因為今次要不斷俾 Tribute 俾個統治者 (算係國王掛!)，討佢歡喜，如果唔係佢會攻擊你個城市。(不過，由於我唔知個 Tribute 既requirement，所以我多數用多架大船運好多過去，點都夠俾啦!)

　　今次由每個城既City Hall 出 Assignment，但所有 Assignment 都只有兩種，一係於限定時間內送貨到指定既城市，另外就係替市長送 Tribute 到指定既城市俾統治者。基本上 做Assignment 只係為左少少回報，對reputation / ranking 好似冇直接影響，於 遊戲中後期，我完全無接呢D Assignment 啦!

　　講到最尾，我認為今次 大航海家4 Patrician IV 比前代既作品係有進步，但比較保守，除畫面、政治系统外，其他方面只係作有限既改動，的確係令我有少少失望!不過作為 Patrician 系列既支持者，我都會買返個正版返唻玩下，始終前兩日玩既並非完整英文版丫嘛!希望遊戲公司會出 Mods 令個Game 更耐玩啦!不過都係開頭講果句，Kalypso Media 出既 Game 我有保留。